“Брат ми го носеше водата, се фаќаше за дрвја за да преживее” – Тажно сведоштво на Алмира, низ солзи откри што се случувало во ноќта на катастрофата (ФОТО)

Во спортскиот центар во Јабланица се згрижени најпогодените од поплавите што ги зафатија делови од Босна и Херцеговина. Сѐ уште нема прецизна бројка на луѓе во центарот, но постојано пристигнуваат нови волонтери и спасувачки тимови.

Алмира Кукиќ, чија фамилија е директно засегната од катастрофата, со солзи во очите раскажа за страотната ноќ.

„Водата почна да навлегува брзо, се обидовме да ја задржиме, но безуспешно. Татко ми отиде во долниот кат каде што остана помалиот брат. За да го спаси, мораше да го разбие прозорецот со нозе. Брат ми го носеше водата, се фати за дрвја за да не го однесе. Водата однесе сѐ. Татко ми успеа да ја спаси мајка ми и другиот брат, и сите се качивме на покривот на куќата. Многу луѓе загинаа, многу соседи ги изгубивме. Но ќе се изгради повторно. Сите помагаат, сите се тука,” со трепет во гласот вели Алмира за Курир.

Во меѓувреме, волонтерката Ајла Шубара, која работи во прифатниот центар, зборува за состојбата таму.

„Соработуваме со Црвениот крст и цивилната заштита, кои упатија повик до граѓаните за помош. Не знаевме за обемот на катастрофата, но веднаш одговоривме. Ќе направиме сѐ што можеме за да се справиме со ова што е можно побрзо,” рече Ајла.

Таа додаде дека најчесто пристигнуваат семејства кои се евидентирани од Црвениот крст.

„Луѓето доаѓаат во облеката во која биле спасени. Обезбедуваме облека, храна и сѐ што им е потребно на сместените семејства, спасувачите и волонтерите. Сите што сакаат да помогнат, може да се обратат до надлежните за да ги распоредат каде што се најпотребни,“ објасни Ајла за Курир.