Германските автомобили пред удар на Трамп: Како ќе реагира индустрискиот гигант?

Како германската автомобилска индустрија се подготвува за царините на Трамп?

Американскиот претседател Доналд Трамп предизвика царинска војна. Тоа го направи со трите најголеми трговски партнери на САД. Воведе царини од 25 отсто за Канада и Мексико. Постоечката царина за увоз од Кина ја удвои на 20 отсто. Иако повлече дел од одлуката и го одложи воведувањето царини на повеќе производи од Мексико и некои од Канада, нагласи дека дополнителни царини ќе воведе на почетокот на април.

Можноста за меѓународна трговска војна поради царините на Трамп доаѓа во незгодно време за германската економија. Таа се намали вторпат по ред во 2024 година. Некогашниот економски гигант, Германија, според проекциите, може да биде најслаб изведувач во Европската Унија во 2025 година. Сепак, експертите сугерираат дека царинската војна меѓу Кина, Мексико и Канада ќе има ограничено влијание врз Германија. Барем засега, освен кога станува збор за германските производители и добавувачи во овие земји.

„Барем на среден рок, може да се очекува одредено пренасочување на трговијата. Производите кои првично биле наменети за американскиот пазар, на пример од Кина, сега би можеле да завршат на европските пазари“, рече Јулијан Хинц. Тој е професор по меѓународна економија на Универзитетот во Билефелд и шеф на истражувачката група за трговска политика на Институтот за светска економија во Кил, пренесува Јуроњуз.

Царините ќе влијаат на работната сила

Германските автомобилски компании, вклучувајќи го и Ауди, произведуваат автомобили во Мексико. Според податоците на германското здружение на производители на автомобили (VDA), германските производители на автомобили произвеле 716.000 автомобили во Мексико. Главно за американскиот пазар. Ако царините на Трамп значат дека германските автомобили произведени во Мексико не можат да се продаваат толку лесно или се значително поскапи во САД, тоа би можело да има поголемо влијание. Од друга страна, САД би можеле да увезуваат нешто повеќе од Европа наместо од Кина, Мексико и Канада, смета професорот. Тој укажува дека тие ефекти донекаде ја замаглуваат целокупната слика.

Во четвртокот, Трамп даде едномесечно ослободување од царините за производителите на автомобили во Мексико и Канада. Тоа беше по преговорите со водечките претставници на индустријата. Сепак, кога ќе истече тој период, германскиот економист Томас Хученројтер вели дека царините и последователно намалената побарувачка за германски автомобили од Мексико би можеле да влијаат на германската, европската и мексиканската работна сила.

Експертите предупредуваат дека сликата драстично се менува ако Трамп одлучи да воведе царини за Европската Унија. Тој тоа го најави кон крајот на февруари.

„Тоа би значело дека поединечните компании ќе мора да ја диверзифицираат својата продажба ширум светот. Со други зборови, ќе мора да го намалат приоритетот на американскиот пазар и повеќе да се фокусираат на други пазари. Тоа е моментално тема на разговори во повеќето германски компании. Сепак, проблемот е што не може да се реагира толку брзо како што се воведуваат царините. Реакцијата бара повеќе време. Затоа последиците ќе бидат видливи на краток рок“, објаснува Хученројтер.

САД најмногу ќе си наштетат себеси

Еден сектор кој е особено изложен на ризик е автомобилската индустрија. Во 2023 година таа сочинуваше 17 отсто од вкупниот германски извоз, според податоците на канцеларијата Germany Trade and Invest (GTAI). Германската автомобилска индустрија минатата година влезе во кризен режим. Некогаш моќни производители како Фолксваген затвораа фабрики и го намалуваа бројот на работни места.

Претседателката на здружението VDA, Хилдегард Милер, во февруари коментираше дека заканите на Трамп за воведување 25 отсто царини за Европската Унија се провокација.

Царините се погрешна алатка за преговори. Ризикот од глобален трговски конфликт со негативни последици за светската економија е висок“, вели Милер.

Според симулациите на Институтот за светска економија од Кил, зголемените царини ќе доведат до економски загуби и инфлација и во ЕУ и во САД. Во Германија, тоа особено ќе ги погоди автомобилската и машинската индустрија. Институтот од Кил проценува дека вкупното производство на автомобили може да падне и до 4 отсто.

„Тоа е голем пад за индустрија која веќе и онака има проблеми. Она што е важно да се нагласи за Германија, но и за целата ЕУ, е дека иако САД се важен трговски партнер, околу 10 отсто од извозот оди таму.

Дури и во најлошото сценарио на воведување драстични царини од страна на САД, најголемиот дел од увозот во ЕУ останува во Унијата. Постојат и бројни други трговски партнери со кои трговијата според правилата на Светската трговска организација и преку договорите за слободна трговија функционира одлично и ќе продолжи да функционира како и досега. САД со ова најмногу ќе си наштетат себеси“, заклучува Хинц.