Страхил
Илон Маск стои цврсто зад својата вчерашна порака упатена до сите федерални службеници, во која со наредба бара од секој од нив да достави листа од пет задачи што ги реализирале во текот на минатата работна недела.
Вработени во американската влада масовно споделуваат скриншотови од електронска пошта што ја добиле од Канцеларијата за персонал, со јасно барање да одговорат во пет точки за нивните работни постигнувања од претходната недела. Крајниот рок за испорака на одговорите е денес, понеделник, до 23:59 часот.
Маск преку социјалната мрежа „X“ објави дека непочитувањето на ова барање и неиспраќањето на извештајот ќе се третира како доброволно напуштање на работното место, односно отказ. Сепак, дел од федералните службеници тврдат дека голем број нивни колеги воопшто не ја добиле спорната електронска порака. Ова барање предизвика бурни реакции, па дел од вработените го окарактеризираа како „вознемирувачко“ и „креирање непријателска работна клима“.
Спорно барање или ефикасен метод на работа?
Сенаторката Тина Смит од Минесота остро го критикуваше потегот на Маск, нарекувајќи го „класичен потег на лош шеф“, на што Маск возврати дека задачата е „тривијална“ и дека веќе добил голем број „одлични одговори“.
Тој дури и спроведе анкета на „X“, поставувајќи прашање дали сите федерални службеници треба да доставуваат неделни извештаи за нивната работа. Резултатите до 10:00 часот беа јасни – од 167.598 гласачи, 84% одговорија потврдно, заокружувајќи го одговорот „да“.
Поддржувачите на ваквата практика истакнуваат дека неделното известување е стандардна процедура во приватниот сектор и го сметаат за нормален и ефикасен дел од управувањето со човечки ресурси. Но, критичарите се на спротивно мислење, тврдејќи дека ваквата политика создава непотребен притисок и стрес врз вработените во јавниот сектор.
Трамп со меме го исмеа „бунтот“ на службениците
Во дебата се вклучи и поранешниот претседател Доналд Трамп, кој со духовито меме од популарниот цртан филм Сунѓерот Боб, ги исмеа федералните вработени кои се побунија поради меилот на Маск, покажувајќи дека и тој не е против ваквиот начин на работа.
