Метеоролог во солзи поради страшниот ураган што ја погодува Америка: „Ова е ужасно!“

Ураганот Милтон, кој се движи кон Флорида, е намален од највисоката категорија 5 на ниво 4, според Националниот центар за урагани на САД (NHC). И покрај ова, постои опасност ураганот повторно да ја достигне максималната сила и да удри силно во веќе погодените делови на американската држава.

Според NHC, ураганот сега достигнува брзина на ветрови до 257 километри на час. Се очекува да помине преку полуостровот Јукатан во Мексико и да стигне до западниот брег на Флорида во среда навечер.

Метеорологот Џон Моралес од NBC 6 Јужна Флорида, емотивно зборуваше за размерите на ураганот, изјавувајќи: „Ова е неверојатен, навистина неверојатен ураган. Притисокот падна за 50 милибари во само десет часа. Извинете, ова е страшно“.

Ураганот доби сила со неверојатна брзина, преминувајќи од категорија 3 на категорија 5 за само неколку часа. Според NHC, ураганот ќе остане „екстремно опасен“ додека не удри на копно.

Директорката на Федералната агенција за управување со итни случаи (FEMA), Дејн Крисвел, изјави дека федералните власти се целосно подготвени за ударот и дека регионалните власти добиваат дополнителни ресурси. Гувернерот на Флорида, Рон ДеСантис, прогласи вонредна состојба за неколку окрузи, а првите евакуации започнаа во понеделник, вклучувајќи делови од метрополитенската област Тампа, што предизвика големи сообраќајни метежи.

Националната метеоролошка служба предупреди дека, доколку ураганот го задржи сегашниот пат, може да биде најлошиот што ја погодил областа Тампа во последните 100 години. Очекува се голем налет на бранови на западниот брег на Флорида во вторник навечер или рано во среда, при што нивото на водата во Тампа може да се подигне до 3,6 метри.

Во Орландо, луѓето чекаа во долги редови со автомобили за да земат песочни вреќи за заштита од поплави.

Еден од жителите, Тони Карлсон (32), успеал да се евакуира во Џорџија заедно со своите миленичиња, изјавувајќи: „Луѓето мислат дека ова ќе биде навистина лошо“. Од друга страна, Марија Торес (29) и нејзиното семејство одлучиле да останат, подготвувајќи се со генератори за електрична енергија, како и со залихи на храна и вода.

Во меѓувреме, и жителите на полуостровот Јукатан во Мексико се подготвуваат за ураганот. Работниците ги затвораат стаклените врати и прозорци, а рибарите ги извлекуваат своите чамци на брегот. Училиштата се затворени. Претседателката на Мексико, Клаудија Шејнбаум, предупреди на можни обилни врнежи преку социјалната мрежа „Икс“.

Оваа година, регионот е веќе погоден од друга силна бура – ураганот Хелена, кој во септември ја погоди Флорида со категорија 4, предизвикувајќи огромни штети. Најмалку 225 лица ги загубија животите, од кои 15 во Флорида, што го направи Хелена најсмртоносниот ураган во последните 50 години, по ураганот Катрина во 2005 година.