Митровденска задушница: Ден за помен и молитва за починатите

Православните христијани денеска го одбележуваат денот на Митровденската задушница, посветен на сеќавањето на нашите починати блиски. Оваа задушница секогаш се паѓа во саботата пред празникот на свети Димитриј (08 ноември) и претставува време кога верниците се собираат за молитва, помен и добри дела во име на упокоените.

На Митровденската задушница, традиционално се посетуваат гробиштата каде што се изведува помен со пченица, лепче и црвено вино, кои се осветуваат со молитва. Според обичајот, верниците делат милостина на сиромашните, молејќи се за мир и покој на душите на оние кои заминале од овој свет. Овој чин не е само израз на почит, туку и дел од грижата за духовното наследство.

Историјата на оваа задушница датира од XIV век и е поврзана со руската православна традиција. Првично, поменот бил наменет за православните војници кои го дале својот живот за верата и татковината, меѓу кои и монасите Александар Пересвјат и Ослабја, кои загинале во битката на Куликовското поле во 1380 година. Со текот на времето, поменот добил пошироко значење и Црквата одлучила на овој ден да се спомнуваат не само војниците, туку и сите починати.

Митровденската задушница, исто како и другите задушници, се смета за еден од најзначајните денови во православниот календар, кога верниците се повикуваат да се сетат на своите починати и да покажат љубов преку молитва и добри дела.