НЕМА НЕДОПИРЛИВИ: Граѓани издејствуваа пајак да крене полициско возило!

Жители на скопското Дебар Маало денеска покажаа дека нема да толерираат ниту неправилно паркирање, дури и кога станува збор за службено лице. Тие интервенираа и издејствуваа пајак службата да подигне возило кое било паркирано на велосипедска патека пред ресторан.

Според очевидци, екипата на пајак службата првично се двоумела да го подигне возилото, бидејќи им било објаснето дека станува збор за службено возило на полицаец кој бил на должност. Сепак, граѓаните кои го забележале прекршокот и го пријавиле случајот, остро реагирале. Тие прашувале како може полицаец да биде на „должност“ четири часа пред кафеана, додека неговото возило го блокира движењето на велосипедистите.

На местото на настанот пристигнал и самиот полицаец, кој се обидел да ги убеди граѓаните и екипата на пајак службата да не го подигнуваат возилото. Но, по упорноста на граѓаните и по консултација со некого преку телефон, полицаецот на крајот рекол: „Кревајте го“.

И покрај тоа, сведоците тврдат дека полицаецот се обидел да ги спречи работниците на пајак службата да ја извршат својата работа. Сепак, нивната интервенција и упорност на крајот резултираа со подигнување на непрописно паркираното возило.