„Нова Македонија“ – 80 години од првиот број на македонски јазик

На денешен ден, 29 октомври 1944 година, во селото Горно Врановци близу Велес, беше издаден првиот број на весникот Нова Македонија – првиот македонски весник на македонски јазик, кој започна како орган на Народноослободителниот фронт на Македонија. Овој значаен настан ја означи новата ера во македонското новинарство и култура.

По првиот број во Горно Врановци, вториот излезе во Битола, а од третиот број весникот продолжи да се печати во Скопје, каде што и денес останува еден од симболите на македонската печатена медиумска историја. Името „Нова Македонија“ беше избрано меѓу три предлози – Независна Македонија, Слободна Македонија и Нова Македонија. Изборот на ова име нагласуваше новата преродба на македонскиот народ и почетокот на една современа македонска држава со свежи принципи и начела.

Весникот со децении останува столб на македонската медиумска сцена, пренесувајќи вести, историски моменти и значајни случувања и со тоа трајно бележејќи ги развојните процеси на државата.