Братска помош од Белград: Црвена звезда ќе игра хуманитарен меч во Скопје за Кочани!

Црвена звезда и Вардар договорија хуманитарен натпревар. Сите приходи ќе одат за настраданите во Кочани.

Црвена звезда денеска испрати порака преку својот директор Звездан Терзиќ. Тој изрази сочувство до народот на Македонија за трагедијата во Кочани. Терзиќ потврди дека „црвено-белите“ ќе играат во Скопје.

„Сите во Црвена звезда беа потресени од трагедијата во Кочани. Веднаш контактиравме со нашите легенди од Скопје, Дарко Панчев и Илија Најдоски. Со нивна помош стапивме во контакт со Вардар. Договоривме хуманитарен натпревар во Скопје на 16 април“, извести Терзиќ.

Сите пари од билетите ќе бидат за семејствата на загинатите во страшната несреќа.

„Ова е најмалку што може да направи Црвена звезда за својата братска Македонија во ова тешко време“, додаде Терзиќ.

View this post on Instagram

A post shared by Arena Sport TV (@arenasporttv)

Веста за многуте жртви, главно млади, ги погоди сите во клубот.

„Изразуваме искрено сочувство до сите семејства на жртвите и до сите граѓани на Македонија. Се надеваме дека овој гест ќе покаже колку нè погоди оваа трагедија. Ние сме обединети во тагата со семејствата на жртвите“, заклучи Терзиќ.

Дарко Панчев разговарал со селекторот на Србија, Драган Стојковиќ Пикси. Предложил хуманитарен натпревар меѓу репрезентациите.

„Се слушнав со Пикси. Тој има многу обожаватели во Скопје и Македонија. Предложив натпревар меѓу репрезентациите. Тој веднаш ме поддржа. Идејата беше одобрена од раководството на Фудбалскиот сојуз на Србија. Ви благодарам за подадената рака, милион пати благодарам“, изјави Панчев за Sportklub.