Влезници за концертите на Адел во Лас Вегас достигнуваат до 70.000 долари!

По успешната серија концерти во Минхен, Германија, каде што настапуваше четири недели, Адел ја продолжува својата турнеја во САД. Сепак, цените на влезниците за концертите во Лас Вегас предизвикаа големо незадоволство кај обожавателите. Настапите ќе траат од крајот на октомври до крајот на ноември, но билетите веќе достигнуваат астрономски суми.

За картите во задните редови, цените се движат од 3.500 до 4.800 долари, додека за оние поблиску до сцената, цените надминуваат 5.000 долари. На платформите за „препродажба“, билетите достигнуваат и до неверојатни 70.000 долари. Оваа ситуација предизвика лавина реакции на социјалните мрежи, каде што многу обожаватели се изјаснија за превисоките цени.

„Таа е неверојатна, но цените на билетите се премногу високи“, „Ако како уметник го дозволуваш ова, тогаш губам секаква почит кон тебе“, и „Имам билети, но сега размислувам да ги продадам“, се дел од коментарите на разочараните фанови.

Покрај тоа, Адел најави дека по завршувањето на оваа турнеја ќе направи подолга пауза од музичката сцена. Таа откри дека сака да се фокусира на своето семејство, но и на нејзините амбиции за глума. Според Светската филмска база на податоци (IMDb), Адел има „Оскар“ за најдобра оригинална песна од 2013 година, но засега нема најава за нејзино учество во нов филм.

Интересно е што пејачката наводно одбила понуда за нови концерти со кои би можела да заработи дополнителни 200 милиони долари, бидејќи сака да поминува повеќе време дома со своето дете.

Обожавателите, иако разочарани од цените на билетите, со нетрпение ја очекуваат нејзината последна серија концерти пред паузата.