Вучиќ денеска се соочува со протест без преседан, Србија го задржува здивот

Србија денеска го задржува здивот пред најавениот масовен антикорупциски протест, и тоа на повик на српските студенти кои се мобилизираат од ноември, пренесе Радио Франс Интернационал (Radio France Internationale – RFI) и укажа дека претседателот на државата Александар Вучиќ никогаш досега не се соочил со протестно движење од вакви размери.

Во Белград денеска се очекуваат стотици илјади луѓе, со ризик од насилство меѓу поддржувачите и противниците на претседателот на Србија, пренесе РФИ. Голем протестен бран ја зафаќа Србија веќе неколку месеци, почнувајќи од трагичниот инцидент на железничката станица во Нови Сад на 1 ноември минатата година. Уривањето на надстрешницата на станицата, која штотуку беше реновирана, остави 15 мртви и предизвика големи емоции и огорченост во Србија.

„Тој смртоносен инцидент е исклучително силен катализатор бидејќи ги обединува сите постапки на режимот во смисла на кршење на владеењето на правото, клиентелистички практики и ендемска корупција“, изјави Софи Геде (Sophie Gueudet), експерт за Балканот и истражувач на Високата школа Санта Ана во Пиза, во Италија.