Германија отвора врати за возачи на камиони од Македонија

Германија се соочува со сериозен недостиг на возачи на камиони, што би можело да предизвика проблеми во испораката на стоки во предбожиќната сезона. Германските шпедитерски здруженија предупредуваат дека недостигот би можел да достигне критично ниво, налик на кризата која ја погоди Велика Британија по Брегзит.

Недостиг од 100.000 возачи

Според портпаролот на Федералната асоцијација на шпедитери и логистика (BGL), Дирк Енгелхард, Германија во моментов има дефицит од 100.000 возачи на камиони, а секоја година околу 30.000 возачи заминуваат во пензија. Притоа, бројот на нови возачи кои влегуваат во професијата е далеку помал.

„Недостигот е толку сериозен што работодавците прават сè за да привлечат нови возачи,“ изјави Енгелхард.

Одлични можности за македонските возачи

Побарувачката за возачи ги отвора вратите за странски работници, вклучувајќи ги и оние од Македонија. Со оглед на зголемената конкуренција за работна сила, возачите се во позиција да избираат работни услови, како типот на возило, рутите и клиентите.

Работодавците нудат атрактивни понуди, но сепак, трошоците за добивање возачка дозвола во Германија остануваат пречка за многумина. Просечната цена на возачка дозвола за камион во Германија изнесува околу 10.000 евра, што е значително повеќе од просекот во другите земји од ЕУ, каде што таа чини околу 3.000 евра.

Подгответе се за можности

Со зголемената побарувачка за транспорт во Германија, вклучително и порастот на онлајн трговијата за 14% во 2024 година, потребата од квалификувани возачи станува критична. Ова претставува одлична можност за македонските возачи кои сакаат да изградат кариера во странство, особено со потенцијални работодавци кои се подготвени да инвестираат во нивната обука и сертификација.

За сите заинтересирани возачи од Македонија, Германија станува ветена земја со перспективи за добра заработка и подобар живот.