Страхил Ф.
По долгогодишна борба со рак на грлото, кој му беше дијагностициран во 2015 година, почина познатиот холивудски актер Вал Килмер. Тој почина на 65-годишна возраст во Лос Анџелес, а причина за смртта се компликации предизвикани од воспаление на белите дробови, како што потврди неговата ќерка Мерцедес Килмер.
Вал Килмер, роден и израснат во долината Сан Фернандо, се прослави со улогата на Том „Ајсмен“ Казански во култниот филм од 1986 година, „Топ Ган“, каде што глумеше рамо до рамо со Том Круз. Оваа улога го лансираше меѓу ѕвездите на Холивуд.
Низ својата богата кариера, Килмер остави незаборавни улоги во многу филмски хитови. Тој беше маестрален како Док Холидеј во вестернот „Тумбстоун“ (1993), го портретираше легендарниот Џим Морисон во биографскиот филм „Дорс“ (1991), а публиката го запомни и како Бетмен во „Бетмен засекогаш“ (1995).
Во текот на својата работа, Килмер соработуваше со многу врвни режисери и успешно толкуваше широк спектар на ликови – од споредни улоги како онаа во „Жештина“ (1995) со Роберт де Ниро, до главни улоги како криминалецот Сајмон Темплар во „Светецот“ (1997). Критичарите често го истакнуваа неговиот извонреден талент и го сметаа за еден од најдобрите американски актери од неговата генерација.
Во периодот од 1988 до 1996 година, Вал Килмер беше во брак со британската актерка Џоан Воли. Зад себе ги остави својата ќерка Мерцедес, која исто така е актерка, и синот Џек.
