Гостивар: 200.000 евра загубени во измама за фотоволтаици

Жител на Гостивар остана без значителна сума на пари, откако падна во замка на меѓународна измама поврзана со изградба на фотоволтаични централи.

Според информациите од МВР, 58-годишен гостиварец пријавил во СВР Тетово дека е измамен за 200.000 евра од страна на Е.И.Ј.(47) од Нигерија, Б.А.(45) и Л.Ј., двајцата од Литванија. Контактите биле воспоставени преку Љ.С.(58) од липковско село.

Во текот на 2023 година, оштетениот уплатил 200.000 евра на сметки во Хрватска, Шпанија и Германија, со договорена инвестиција за изградба на фотоволтаични централи. Според договорот, странските државјани требало да инвестираат 50 милиони евра во заедничкиот проект. Сепак, тие не ги исполниле своите обврски, а подоцна било откриено дека договорите не се заверени на нотар, што укажува на измама.

МВР интензивно работи на расчистување на овој случај.