Деветгодишниот Филип со аутизам испраќа силна порака: „Нè боли кога се сурови, а ние сме полни со љубов“

Во трогателно видео, Филип упати апел за повеќе љубезност и емпатија кон лицата со аутизам.

Со зрелост која ги надминува неговите години, Филип истакна: „Единствено што јас можам да кажам е дека доброто со добро се враќа. Лошите луѓе нека не бидат сурови, бидејќи нè боли, а ние сме полни со љубов.“ Тој исто така нагласи дека поддршката за лицата со аутизам не треба да биде само на 2 април, туку секој ден во годината.

„Здраво на сите. Јас сум Филип Циглењак Симоновски. Јас сум дете со аутистичен спектар“, започнува Филип во своето видео, додавајќи дека неговата порака е за сите деца со аутизам кои не можат да се изразат. Тој сподели дека иако многу луѓе се добри и љубезни кон него, има и такви кои се сурови. „Јас би им порачал на аутистите да веруваат во самите себеси, да си го слушаат срцето и да си ги следат соништата. Без разлика што да им речат луѓето, дека не се добри, дека нема да успеат, сепак верувајте си во срцето, слушајте си ги и следете си ги соништата“, порача Филип.

Мајката на Филип, Ана Марија, го сподели видеото на социјалните мрежи, повикувајќи на континуирана свест и поддршка за аутизмот. Таа го опиша Филип како дете со безгранични приказни и таленти.

Еден од тие таленти е неговата страст за сликање. Филип создава впечатливи уметнички дела кои добиваат бројни пофалби. Својата прва изложба ја имаше на само девет години, докажувајќи дека аутизмот не претставува пречка за остварување на соништата.