Денеска се одбележува Св. апостол Јаков, Брат Господов

Според календарот на Македонската православна црква, на денешен ден, 5 ноември, се празнува Св. апостол Јаков, познат и како Брат Господов. Јаков се нарекува „Брат Господов“ затоа што е син на Јосиф, свршеникот на Богородица, од неговиот претходен брак. Поради својата близина и посветеност кон Исус Христос, Јаков се издвојува како еден од најзначајните христијански личности.

Како епископ на Ерусалим, Св. Јаков ја составил првата литургија што се користела во раните христијански заедници. Неговиот праведен живот му донел голема почит кај Евреите, кои го нарекувале Јаков Праведниот. Но, токму тие, поради неговата вера во Христос, го осудиле на смрт и го фрлиле од покривот на храмот. Јаков го завршил својот живот маченички во првиот век, оставајќи силен пример на вера и жртвување за Христос.