Маша
Зимскиот период традиционално носи зголемена потрошувачка на електрична енергија, но оваа година, за многу граѓани во Македонија, тоа значи и непријатно изненадување на нивните сметки. Соочени со високи износи,1385 корисници на ЕВН Хоум поднеле официјални поплаки за корекција на фактурите.
Според информациите од ЕВН Хоум, само во јануари годинава пристигнале 1385 барања за корекција на фактурите, додека во декември 2024 година тој број изнесувал 898. Иако бројот на поплаки е намален во споредба со претходната година, незадоволството кај граѓаните останува присутно.
Регулаторната комисија за енергетика (РКЕ) исто така забележува присуство на поплаки, но во помал обем од претходните години. Во моментот, до РКЕ се пристигнати два приговори, што е значително помалку од ланските 30-тина и 2023 година кога се жалеле 70 луѓе.
РКЕ потсетува дека незадоволните корисници прво треба да се обратат до ЕВН Хоум, а доколку не добијат задоволителен одговор, можат да поднесат приговор до РКЕ. При поднесување на приговор, потребно е да се приложат копии од приговорот до ЕВН, одговорот од ЕВН и спорната сметка.
Надлежните апелираат граѓаните редовно да ги контролираат и читаат своите броила за да се избегнат евентуални несогласувања во пресметките. Дополнително, на социјалните мрежи граѓаните споделуваат искуства и совети за следење на тарифните блокови и избегнување на високи тарифи.
Од јануари годинава, цената на електричната енергија е зголемена во просек за 0,92% за домаќинствата во прв, втор и трет блок. Поскапувањето по блокови изнесува 0,68% за прв, 0,90% за втор, 1,93% за трет и 2,24% за четврти блок. Мрежарината е намалена за 7%, од 2,3 на 2,14 денари.
