ЗИМА ВО АПРИЛ: Сибирски студ и снег ја зафаќаат Македонија утре!

Се најавува драстична промена на временските услови во Македонија. Утре, недела, 6 април, земјата ќе биде зафатена од студен бран кој доаѓа директно од Сибир.

Овој студен проток на воздух ќе предизвика формирање на снежен циклон, што ќе резултира со значително опаѓање на температурите.

Според метеоролошките прогнози, температурите ќе паднат за 10 до 15 степени Целзиусови во однос на денешната сабота. Овој циклон ќе донесе пообилни врнежи кои ќе преминат во снег не само на повисоките места и планините, вклучувајќи ги и скијачките центри, туку и во повеќето градови и населени места во ниските предели.

Се очекува повремено да дува силен северен ветер со брзина над 65 километри на час, што ќе придонесе за чувство на уште поголем студ.

На планините и во скијачките центри ќе се формира снежна покривка од 10 до 20 сантиметри, а во некои делови висината на снегот може да надмине и 30 сантиметри. Во градовите, особено во западниот дел на Македонија, се очекува снежна покривка од 5 до 10 сантиметри, со можност за локално поголема висина. Во останатите делови на земјата, вклучувајќи го Повардарието и југоисточните предели, снежната покривка ќе биде многу мала или целосно ќе изостане.

За Скопје, утре се прогнозираат врнежи кои на околните планини и во повисоките делови од котлината ќе бидат во вид на снег и ќе формираат снежна покривка. Можно е слабо провејување на снег да има и во пониските делови од градот. Во скопскиот регион исто така ќе дува повремено силен северен ветер со брзина над 60 километри на час.