Страхил Ф.
Сузана Турунџиева е добро познато лице од македонските ТВ екрани, каде веќе неколку години е дел од утринската програма на „Алфа телевизија“.
Нејзината култура, смиреност и пријатен глас ја прават омилена кај гледачите. Но, животот на Сузана крие многу повеќе од нејзиниот професионален успех. Таа има минато полно со предизвици и загуби, што ја обликувало во силната жена која е денес.
Еден период од своето детство, Сузана го поминала живеејќи во напуштено училиште во селото Маково. Нејзините родители, кои биле учители, во тоа време немале друга опција за живеење и штеделе за да купат сопствен дом.
Така, заедно со нејзиниот брат, родителите и Сузана живееле во една од училниците, која ја претвориле во свој дом. Таа се сеќава на многу ѕвезди на небото над селото и на детските караници со брат ѝ за тоа чија ѕвезда е посветла.
Во едно интервју, Сузана со насмевка раскажа и за една случка од детството кога добила ќотек од мајка ѝ. Како првооделенче, таа имала кукла од Шпанија со убава коса.
Инспирирана од популарноста на Здравко Чолиќ и неговите локни, Сузана решила да ги испроба своите фризерски вештини на куклата.
Зафатот завршил со скратена коса на куклата и заслужен ќотек од мајка ѝ, која, како што вели Сузана, за чудо не се сеќава на овој настан.
Претходно во животот, Сузана се соочила со загубата на својот втор сопруг Марјан, кој починал ненадејно пред очите на нивната малолетна ќерка Матеа.
Таа признава дека било многу тешко да се продолжи животот по неговата смрт, особено за малата Матеа. Животната приказна на Сузана Турунџиева е сведоштво за нејзината сила и способност да се носи со сите предизвици што ги носи животот.
