Крвав хаос во Сирија: Над 1.000 жртви за 48 часа, масакри врз цивили!

Повеќе од 1.000 луѓе, вклучувајќи 745 цивили, биле убиени во дводневните судири меѓу сириските безбедносни сили и борците лојални на соборениот режим на Башар ал Асад, објави Сириската опсерваторија за човекови права (SOHR).

Според оваа британска организација, во борбите загинале 125 припадници на безбедносните сили и 148 лојалисти на Асад, додека различни процени сугерираат дека бројот на жртвите би можел да биде поголем. Се споменува дека во петокот и саботата биле извршени околу 30 масакри врз Алавитите, верската малцинска заедница од која потекнува Асад.

Бунт на лојалистите на Асад и масовна одмазда

Судирите избиле во четвртокот кога борците лојални на соборениот режим на Асад ги нападнале безбедносните сили во Џаблех, град во крајбрежната провинција Латакија.

Оваа широко координирана офанзива беше најголемиот предизвик за новите сириски власти, кои дојдоа на власт пред три месеци кога опозицијата, предводена од исламистичката група Хајат Тахрир ал-Шам, го собори Асад.

За да го задуши бунтот, сириската влада повика засилување, предизвикувајќи илјадници борци да пристигнат на брегот од сите делови на земјата. Иако официјално се под контрола на новата влада, многу милиции останаа недисциплинирани и обвинети за злосторства во минатото.

Сириската влада призна дека имало масовни убиства, но тврди дека „индивидуалните акции“ предизвикале цивилни жртви и дека доаѓањето на големиот број борци во крајбрежниот регион довело до кршење на човековите права.

Масовни егзекуции и насилство врз цивили

Според Сириската мрежа за човекови права, повеќе од 40 луѓе биле убиени одеднаш во градот Ал-Мухтарија, додека на видеоснимките кои се појавија на социјалните мрежи можат да се видат борци во безбедносни униформи како егзекутираат луѓе од непосредна близина, ги принудуваат затворениците да лаат како кучиња и брутално ги тепаат. Автентичноста на снимките не е независно потврдена.

Латакија, регион со голема популација на Алавити, сектата од која потекнува соборениот претседател Асад, стана место на убиства од одмазда. Иако повеќето Алавити не беа поврзани со режимот на Асад, новата влада вети дека нема да има одмазда против оваа малцинска заедница.

Но, убиствата на стотици Алавити во последните денови предизвикаа бран страв меѓу членовите на оваа религиозна група.

Жител на градот Снобар во Латакија опиша како вооружени напаѓачи убиле најмалку 14 негови соседи од семејството Арис, меѓу кои и 75-годишен татко и неговите три сина, егзекутирани пред очите на нивната мајка.

„Откако ги убиле таткото и синовите, и рекле на мајката да го извади златото или ќе ја убијат и неа“, рекол мажот кој побарал да остане анонимен од безбедносни причини.

Друг жител на Латакија рекол дека нема струја и вода повеќе од 24 часа и дека луѓето се плашат да ги напуштат своите домови поради милитантите кои убиваат секој кој ќе им се најде на патот.

„Тела се расфрлани по улиците. Ова е колективна казна“.

Меѓународни реакции

Претставникот на ОН за Сирија, Геир Педерсен, повика на заштита на цивилите, додека Франција го осуди насилството врз цивилите „поради нивната религија“.

Француското Министерство за надворешни работи ги повика сириските власти да обезбедат независни истраги за масакрите и казнување на одговорните.

Групите за човекови права предупредија дека вистинската посветеност на транзициската правда и инклузивната влада се клучни за да се спречи Сирија повторно да влезе во спирала на насилство.

Новата сириска власт се очекува овој месец да го објави составот на новата влада, која ќе биде внимателно анализирана за да се утврди дали ја одразува верската и етничката разновидност на земјата, особено по овој бран насилство.