ЛОНДОН ПОТОПЕН, ДАНСКА ЈА НЕМА: Мапа на Европа ако се стопи целиот лед

Научниците проценуваат како би изгледала Европа доколку се стопи целиот лед на Северниот и Јужниот пол, што би довело до катастрофални последици за многу градови и држави, вклучувајќи го и потопувањето на Лондон и исчезнувањето на Данска.

Лондон со Биг Бен под вода би станал само спомен, Венеција со своите величествени канали и плоштадот Свети Марко би биле проголтани од Јадранското Море, а Истанбул, Стокхолм, Санкт Петербург, Брисел, Барселона и многу други градови би завршиле на дното на морето, додека Данска и Холандија целосно би исчезнале од мапата.

Ова е само дел од сценариото кон кое човештвото се движи поради топењето на целиот лед на планетата, а штетата што човекот ја предизвикува придонесувајќи за глобалното затоплување со испуштање сè поголеми количини на јаглерод диоксид во атмосферата е непоправлива, и научно е докажан факт дека нивото на светските океани од година во година се зголемува.

Научниците се согласни дека со ова темпо до крајот на овој век нивото на морето ќе се подигне за најмалку метар и половина, а најверојатно и повеќе, но колку вода е содржана во ледот што се наоѓа на копното најдобро илустрира мапата направена од „National Geographic“ и податокот дека во случај на топење на целиот лед на планетата, нивото на морето би се подигнало за неверојатни 66 метри.

На Земјата има речиси 21 милион кубни километри лед, и ако човештвото продолжи да ослободува јаглерод диоксид, ќе бидат потребни околу 5.000 години за сè да се стопи, меѓутоа, научниците предупредуваат дека дури и зголемување на нивото за неколку метри ќе предизвика огромна и непоправлива штета.

Доколку создадеме услови на планетата да нема лед, просечната температура на Земјата ќе биде 27, наместо сегашните 15 степени Целзиусови, наведува „National Geographic“, а интересно е што Србија, според оваа проекција, е една од најмалку погодените држави.

Од друга страна, Данска практично би исчезнала, а многу делови од Бенелукс, Франција, Велика Британија, Бугарија, Финска, Русија и Италија исто така би биле сериозно погодени.

Ова сценарио предизвика бројни реакции на социјалните мрежи и лавина коментари на Reddit каде што беше објавена мапата.