Мајката на убиената ученичка бара правда: „Нема да застанеме додека правдата не се задоволи“

Малолетниот убиец кој на 3 мај во основното училиште „Владислав Рибникар“ уби девет врсници и еден припадник на обезбедувањето, ќе сведочи на судењето кое е закажано за 8 октомври, во процесот што се води против неговите родители, откри Нинела Радиќевиќ, мајката на Ана Божовиќ, петтоодделенка која беше убиена за време на нејзината смена како дежурна ученичка.

„Досега немав сили да присуствувам на судењата. За 8 октомври е закажано следното рочиште и верувам дека ќе биде повикан малолетниот убиец да сведочи. Што ќе каже, искрено, немам потреба да слушам. Единствената потреба ми е правдата да биде задоволена,“ изјави Радиќевиќ.

Таа категорично додаде: „Нема да застанеме додека не се задоволи правдата“.

Владимир Кецмановиќ, таткото на детето, е обвинет за сериозно дело против јавната безбедност, бидејќи го водел своето дете, кое во времето на трагедијата имало само 13 години, на стрелиште и го учел да пука, како и за тоа што не го чувал оружјето кое го поседувал во домот на адекватен начин.

Мајката, Милјана Кецмановиќ, пак, е обвинета за нелегално поседување, носење и промет на оружје, откако нејзиниот ДНК бил пронајден на еден од куршумите во училницата, како и на гумата за коса која го врзувала шишето во кое нејзиниот син направил Молотов коктел.

„Судскиот процес против семејството Кецмановиќ не е директно поврзан со убиствата, туку со несоодветното чување на оружјето и присуството на ДНК. За самото убиство нема одговорност, бидејќи малолетникот тогаш не бил кривично одговорен. Ние нема да застанеме на оваа точка, ќе продолжиме да бараме одговорност од сите кои биле поврзани со злосторството. Ова прашање ми стана поважно од самиот живот. Некој мора да одговара и државата мора да испрати јасна порака дека вакви нешта не се прифатливи,“ истакна Нинела за време на нејзиното гостување на ТВ Прва.

Таа исто така додаде: „Жал ми е за тоа дете. Но, вие сте одговорни за вашето дете и неговите постапки. Ако не се чувствувате одговорни за масовното убиство кое го извршило вашето дете, каква порака праќате? Тоа е ужасно и не можам да го разберам,“ заврши Радиќевиќ.