Митровден: Обичаи и верувања што Македонците ги почитуваат со векови

Утре, 8 ноември, верниците го слават Митровден, празникот посветен на Свети Димитриј Солунски – голем светител и заштитник на христијаните. Покрај религиозното значење, овој ден е поврзан со многу народни обичаи и верувања, кои Македонците ги почитуваат со генерации.

Што не треба да правите на Митровден?

1. Без тешка физичка работа
   Според обичаите, на ден пред Митровден и на самиот ден, не се извршуваат тешки физички активности и поголеми работи на отворено. Се верува дека завршувањето на сите важни работи пред празникот носи мир и заштита за претстојната зима.
2. Останете дома на ноќта пред празникот
   Постои верување дека на ноќта пред Митровден треба да се остане дома. Оние што ќе ја поминат ноќта надвор, според народното верување, цела година ќе ноќеваат во туѓи домови. Исклучок се оние кои се поканети на слава кај блиски роднини или пријатели, но и тие треба да се вратат дома пред крајот на вечерта.
3. Избегнувајте карање со децата
   На овој ден се смета дека не треба да се караат децата, дури и ако згрешат, за да не бидат немирни целата година. Ова верување е длабоко вкоренето и се смета за знак на почит и трпение кон децата.
4. Не допирајте вретено, чешли или ножици
   Традицијата вели дека жените на Митровден не треба да користат вретено, чешли или ножици, бидејќи тоа се смета за лош знак и може да донесе несреќа.
5. Поставување белутраци за заштита од глувци
   Во селата, како дел од народниот обичај, се става бел камен (белутак) на секој агол од просторијата за да ги заштити домовите од глувци во текот на зимата.

Пророштва за зимата и времето

Според старите верувања, времето на Митровден може да предвиди каква ќе биде зимата. Ако времето е ладно, се смета дека зимата ќе биде долга и студена, а ако е топло, се очекува помека зима.

Славењето на Митровден е време кога Македонците се сеќаваат на длабоките корени на народните обичаи и верувања, со надеж дека почитувањето на овие традиции ќе донесе мир, здравје и среќа за нив и нивните семејства.