Немаше свои деца, но посвои 48 и им даде живот од бајките: Тешката животна приказна на Есма Реџепова

Македонската пејачка од ромско потекло, Есма Реџепова, која почина во декември 2016 година, остави длабок и незаборавен белег на музичката сцена и во срцата на многумина. Родена во 1943 година во Македонија, Есма беше петто дете од шестчлено семејство. Нејзиниот татко ја загуби ногата при бомбардирањето во 1941 година, а Есма од рани години помагаше на семејството да преживее со достојни приходи.

Како младо девојче, таа извршуваше различни работи – чувала кучиња, носела млеко, чистела станови – сѐ за да им помогне на своите најблиски. Нејзиното детство било исполнето со предизвици, но токму тие тешки моменти ја изградиле како личност. „Детството ми беше многу тешко, но тоа беше голема животна школа,“ велеше Есма, додавајќи дека и покрај сите предрасуди со кои се соочувала, секогаш наоѓала начин да продолжи напред.

Со само 10 години започнала да пее, а на 13 години победила на музичко натпреварување каде го запознала познатиот хармоникаш и диригент, Стева Теодосиевски. Со дозвола на нејзините родители, таа започнала да настапува на турнеи со оркестарот на Теодосиевски, што било почетокот на нејзината блескава музичка кариера.

Стева, кој бил нејзин учител и соработник, станал и нејзин животен сопатник, и покрај разликата во годините – тој бил 22 години постар. Иако не можеле да имаат свои деца, Есма и Стева им помогнале на многу други. Усвоиле дури 47 деца, главно момчиња, кои ги школувале и ги вклучиле во нивниот оркестар „Теодосиевски“. Есма ги одгледала сите свои „синови“ со голема љубов и финансиски ги обезбедила. Подоцна, таа усвоила и едно девојче.

Нивниот брак бил хармоничен и полн со почит. „Имавме убав брак, никогаш не се лутевме еден на друг. Ситните кавги ги решававме со шега“, се присетуваше Есма.

Покрај својата музичка кариера, Есма беше и активен хуманитарец. Нејзината посветеност кон помагање на другите беше толку силна што двапати беше номинирана за Нобелова награда – првиот пат во 1987 година како кандидат на Црвениот крст на Југославија, а вториот пат на иницијатива на Светската организација на Ромите.

Во текот на својот живот, таа остави неизбришлив печат во музичката историја, создавајќи повеќе од 580 уметнички дела, вклучувајќи над 100 синглови, 20 албуми и учество во шест филма. Во 1976 година, во Индија, таа беше прогласена за кралица на ромската музика, титула која ја носеше со гордост до крајот на својот живот.

Есма Реџепова почина во декември 2016 година, во 73-та година од животот, оставајќи зад себе музичко и хуманитарно наследство кое ќе се памети со генерации.