НЕОБИЧНА ПРИКАЗНА ОД ХОЛИВУД: Како Вал Килмер го игнорирал Раде Шербеџија за време на снимање!

По повод кончината на актерот Вал Килмер, Раде Шербеџија се сети на времето кога работеа заедно на филмот „Светецот“ (The Saint) од 1997 година.

Во интервју за порталот „Фокус прес“, Шербеџија раскажа за неговото искуство со Килмер, кој почина на 65-годишна возраст по долга борба со ракот.

Шербеџија се присети дека „Светецот“ бил еден од најскапите филмови во светот во тоа време, со Вал Килмер и Елизабет Шу во главните улоги. Тој исто така спомена дека студиото првично го сакало Ентони Хопкинс за улогата која на крајот ја добил тој, но режисерот Филип Нојс инсистирал на него.

Најинтересниот дел од неговото сеќавање е анегдотата за односот со Вал Килмер за време на снимањето. „Една од најсмешните анегдоти се случи на снимањето на ‘Светецот’, каде што глумев со Вал Килмер. Во текот на целото снимање, Вал не сакаше да разговара со мене. Не ме ни поздравуваше“, откри Шербеџија. Тој призна дека се чувствувал збунето од таквото однесување, но продолжил професионално да си ја врши работата.

Сепак, на последниот ден од снимањето, Килмер приредил изненадување. „Го завршивме снимањето, а Вал одеднаш претрча преку целиот сет, ме прегрна, ме крена во воздух и возбудено рече: ‘Раде, јас тебе многу те сакам! Извини! Јас сум американски актер, а нашиот систем на работа е ваков – ако си мојот противник во филмот, не смеам да зборувам со тебе, ниту да те сакам додека трае снимањето’“, раскажа Шербеџија.

Шербеџија со насмевка му одговорил: „Знаеш што, Вал, јас бев професор по глума на Академијата за драмски уметности. Добро ги знам проблемите на младите актери“.