Несекојдневен медицински феномен: Тинејџер по операција заборавил да зборува на мајчиниот јазик

17-годишно момче од Холандија доживеа несекојдневен медицински феномен, оставајќи ги докторите и неговите најблиски во целосна збунетост.

По рутинска операција на коленото и општа анестезија, тинејџерот се разбудил без способност да зборува на својот мајчин холандски јазик, зборувајќи исклучиво на англиски. Дополнително, тој бил убеден дека се наоѓа во САД, а не во Холандија, каде што всушност живее.

Според докторите, момчето развило ретка и необична состојба наречена „синдром на странски јазик“. Овој феномен се карактеризира со губење на способноста за зборување на мајчиниот јазик, додека пациентите почнуваат да зборуваат друг јазик кој претходно го познавале, но ретко го користеле во секојдневниот живот.

Случајот на овој млад човек веднаш го привлече вниманието на холандските медиуми, а докторите од универзитетската болница во Утрехт детално го испитуваат неговиот мозок во обид да откријат што точно предизвикало ваква неочекувана реакција.

Невролозите објаснуваат дека ваквата состојба може да биде предизвикана од стрес, мозочен удар или ретки реакции на анестетикот.

Семејството на момчето било шокирано кога сфатило дека тој не ги препознава родителите, ниту пак може да комуницира со нив на нивниот заеднички јазик. Тие објаснуваат дека нивниот син добро го зборувал англискиот јазик и претходно, но никогаш не го користел како главен јазик на комуникација.

За среќа, со текот на времето неговата способност да зборува холандски постепено се враќа, но случајот останува медицинска мистерија што ќе биде предмет на понатамошни истражувања.