Страхил Ф.
Силен земјотрес со јачина од 7,7 степени според Рихтеровата скала го погоди централен Мјанмар. Потресите се почувствуваа сѐ до главниот град на Тајланд, Бангкок.
Силен земјотрес со јачина од 7,7 степени според Рихтеровата скала го погоди централен Мјанмар околу 12:50 часот по локално време, соопшти Геолошкиот институт на Соединетите Американски Држави. Потоа следеше уште еден потрес од 6,4 степени според Рихтеровата скала. За неговата јачина сведочат снимките од Бангкок, каде што еден облакодер се урна како кула од карти!
- Тресеше околу една минута, потоа истрчавме од зградата. Видовме и други луѓе како бегаат од станбени објекти. Сѐ се случи во секунда и беше силно – изјави неименуван жител на мјанмарскиот Јангон за Си-Ен-Ен.
Првите фотографии од Мјанмар докажуваат дека штетата по разорниот потрес е огромна.
Потресите се почувствуваа сѐ до главниот град на Тајланд, Бангкок. Новинар на „Јутарњи лист“ извести за сцени од својот стан на 16-ти кат од облакодер со вкупно 38 ката.
- Зградите распукаа, нѐ евакуираа од облакодерот во случај да се сруши – рече тој.
Други, за жал, немаа толку среќа. Социјалните мрежи се преплавени со снимки на кои се гледаат урнати згради. Меѓу нив е и една на која се гледа како голем облакодер во изградба се урна како кула од карти. За секунда оваа огромна градба стана куп шут!
BREAKING: Closeup video shows the moment skyscraper collapses in Bangkok, Thailand from powerful earthquake.pic.twitter.com/IKhRrecvQc
— AZ Intel (@AZ_Intel_) March 28, 2025
Работниците кои се затекнаа таму бегаа без да погледнат назад.
Според информациите на итните служби, во облакодерот од 30 ката во моментот на уривањето имало повеќе од 50 градежни работници, извести Дојче веле.
Како што извести Си-Ен-Ен, едно лице загина, а 50 се повредени.
Тајландскиот премиер прогласи вонредна состојба во Бангкок.
На кинеските социјални мрежи корисниците рекоа дека можеле да го почувствуваат потресот во провинциите Јунан, на границата со Мјанмар, и Шанси.
