Огромен древен град на Маите откриен во мексиканската џунгла со помош на ласерско скенирање

Археолозите открија огромен, антички град на цивилизацијата на Маите во густите џунгли на мексиканската држава Кампече. Наречен Валеријана, овој заборавен град содржи пирамиди, амфитеатри, населби и спортски терени, и е откриен благодарение на напредната ласерска технологија Лидар, која може да „види“ низ дебелиот слој на вегетација.

Значајно откритие – втор по големина град на Маите

Истражувачите веруваат дека Валеријана е втор по големина град на Маите, веднаш зад Чалакмул, кој се смета за најголемиот досега откриен. Градот опфаќа површина колку и шкотската престолнина Единбург и, според проценките, некогаш бил дом на меѓу 30.000 и 50.000 жители.

Лидар – револуција во археологијата

Откритието е дело на археолози од универзитетот Тулејн, меѓу кои е и студентот Лук Олд-Томас. Тој, пребарувајќи податоци онлајн, пронашол истражувања од мексикански екологисти и успеал да идентификува структурите што други истражувачи ги пропуштиле. Со Лидар технологијата беа откриени вкупно 6.764 артефакти со различни димензии, што нуди важен увид во секојдневниот живот на Маите.

„Лидар комплетно го промени начинот на кој пристапуваме кон археолошките истражувања,“ изјави археологот Марсело Кануто. Оваа технологија овозможува побрзи и подетални истражувања на региони покриени со вегетација, што може да доведе до нови откритија за изгубените цивилизации.