Откријте ја вистинската приказна за потеклото на Штрумфовите – можеби ќе ви ги сруши детските спомени

На 23 октомври 1958 година, пред точно 66 години, светот за првпат се запозна со малите сини суштества – Штрумфовите, кои станаа глобален феномен. Создадени од белгискиот уметник Пјер Кулифор, познат како Пејо, Штрумфовите прераснаа во франшиза што опфати стрипови, филмови, телевизиски серии и видео игри.

Нивната шармантна природа, дружељубивост и едноставност ги направија омилени меѓу сите генерации, но во последната деценија почнаа да кружат контроверзни теории дека овие ликови имаат скриени политички пораки, дури и антисемитски симболизам. Најпопуларна меѓу нив е онаа која Штрумфовите ги поврзува со комунистички идеи.

Теоријата за “комунистички” Штрумфови

Сè започнало со видео објавено на Јутјуб во 2008 година од корисник по име Еван Топхам, кое ја оживеало теоријата дека Штрумфовите го отсликуваат идеалното комунистичко општество. Според оваа теорија, нивниот колективен живот, самодоволност и заедничка работа за доброто на сите се одлики на социјалистичкиот модел. Во видеото, дури и Великиот Штрумф, со својата црвена капа, се споредува со Карл Маркс.

Дополнително, злобниот лик, Гаргамел, наводно го претставува капитализмот. Во теоријата, неговата алчност и немилосрдност го симболизираат корумпираниот поединец кој ги става своите лични интереси пред општеството.

Дали Штрумфовите навистина се политички?

Иако овие теории предизвикуваат внимание на интернет, семејството на Пјер Кулифор ги отфрли сите вакви обвинувања. Тиери Кулифор, синот на Пејо, во неколку наврати истакнал дека неговиот татко никогаш не се интересирал за политика и дека Штрумфовите се создадени исклучиво за забава.

Иако теориите за скриени значења може да бидат возбудливи за некои, самите Штрумфови остануваат симбол на безгрижната радост и детска фантазија, далеку од какви било политички или идеолошки подтонови.