Страхил
Сезоната во Охрид сѐ уште не е официјално започната, но угостителите веќе забрзано се впуштаат во потрага по работници.
Во нивниот обид да ги привлечат домашните келнери, охридските ресторани, кафулиња и хотели излегуваат со понуди од 1.000 евра месечна плата за петмесечен ангажман. Но, и покрај овие примамливи услови, многу од нив сè уште се мачат да го пополнат тимот.
Веќе неколку години наназад, дефицитот на квалификуван келнерски и друг угостителски кадар е константен проблем во туристичките центри низ Македонија, а Охрид и Струга се особено погодени од овој тренд.
Егзодусот на млади кон странство го празни Охрид од келнери
Масовното заминување на младите во странство, во потрага по финансиски поисплатливи работни места, ги принуди охридските газди да бараат решенија и надвор од границите на земјата.
„Пробавме сè, но работници едноставно нема“, ни раскажува сопственик на ресторан во Охрид, кој истакнува дека годинава понудиле значително зголемени плати, но сепак се борат со недостиг на персонал.
„Платите што ги нудиме се далеку над македонскиот просек. Бараме искусни келнери и келнерки, но отворени сме и за почетници. И покрај сè, интересот кај домашната работна сила е минимален. Објавуваме огласи, контактираме поранешни вработени, но многумина се веќе во странство или едноставно не сакаат да работат во угостителство“, објаснува нашиот соговорник.
Работата е напорна, стресот голем – младите бегаат во други сектори
Дел од угостителите сметаат дека проблемот не е само заминувањето на младите, туку и работните услови.
„Точно, платите се добри, но не треба да се заборави дека оваа работа бара огромен физички напор. Сезоната е интензивна, туристи има многу, а очекувањата се високи. Некои млади преферираат работа во маркети или магацини, каде стресот е помал, па иако платите се пониски, им се попривлечни“, вели Наташа, менаџерка на реномиран хотел во Охрид.
Странски работници – спас или само краткотрајно решение?
Во ваква ситуација, сè повеќе угостители се насочуваат кон вработување на работници од странство, особено од Турција, Непал, Филипините и Индија.
Според официјалните статистики, минатата туристичка сезона во Охрид беа ангажирани над 200 работници од странство.
„Минатата година вработивме пет момци од Египет. Се покажаа како исклучително добри работници, брзо се прилагодија и беа задоволни од заработката. Но, ова е поскапа опција за нас, бидејќи треба да им обезбедиме сместување и храна, што значително ги зголемува вкупните трошоци“, дополнува сопственик на популарен ланџ-бар во Охрид.
Туристите се поделени: Дали странски келнери го нудат истото гостопримство?
Од друга страна, дел од туристите се на мислење дека домашната услуга е неспоредливо подобра и дека странските работници, иако се трудат, не можат целосно да ја доловат автентичната атмосфера на македонското гостопримство.
„Едноставно е поубаво кога ќе седнеш во ресторан и ќе те послужи келнерка од Охрид или Битола, бидејќи нивната комуникација е полична и потопла. Но, разбирам дека угостителите се во сериозен проблем“, коментира Иван Георгиев, турист од Скопје, кој секое лето одмора во Охрид.
