БРОЈОТ НА ЖРТВИ ВО КОЧАНИ СЕ ИСКАЧИ НА 60: Почина управителот на дискотеката

Бројот на жртви од катастрофалниот пожар во Кочани достигна 60. Министерството за здравство потврди дека починал уште еден од пациентите кои беа во критична состојба и се лекуваа во странство.

Министерот Арбен Таравари на денешната прес-конференција изјави дека починатиот пациент имал 40 отсто изгореници на телото и развил откажување на бубрезите поради што бил ставен на дијализа уште на 1 април.

Таравари информираше дека станува збор за Александар Карадакоски, управителот на дискотеката „Пулс“, каде што се случи трагедијата на 16 март. Карадакоски беше еден од четворицата пациенти кои беа во критична состојба и кои беа пренесени на лекување во Литванија.

„Од 1 април му откажа работата на бубрезите, практично беше ставен на дијализа. За жал, утрово ја добив лошата информација дека тој починал. Да се надеваме дека другите критични да им се подобри состојбата. Пациентот што почина, 40 отсто од телото му беше со изгореници. На крајот, главниот проблем беше инфекцијата која што ја доби поради огромна површина на рани кои ги имаше на телото“, изјави министерот Таравари.

Министерството за надворешни работи веќе ја започна процедурата за враќање на телото на починатиот во земјата. Повеќе детали за состојбата на останатите пациенти се очекуваат на прес-конференцијата која ќе се одржи во 13:30 часот во Министерството за здравство.