Страхил Ф.
Премиерот Христијан Мицкоски денеска се сретна со деветнаесетгодишниот Јован Костадинов од Виница, младиот човек кој се истакна со својата исклучителна храброст и самопожртвуваност при спасувањето на 21 лице од огнената стихија во Кочани, настан кој ја потресе целата држава.
За време на средбата, премиерот Мицкоски не штедеше зборови за пофалба на херојскиот чин на младиот Јован, истакнувајќи дека тој, и покрај своите млади години, покажал зрелост и храброст кои ретко се среќаваат. „Јован, со само 19 години, направи нешто што малкумина би се осмелиле. Без размислување, влезе во запалениот објект и извлече 21 човек од сигурна смрт. Тој е симбол на човечност, одговорност и бескрајна посветеност кон другите,“ напиша Мицкоски на својот профил.
Како дополнително признание за неговата несебична храброст и хуманост, реномираната компанија Алкалоид одлучи да му додели на Јован Костадинов четиригодишна стипендија, со што ќе му овозможи непречено да го продолжи своето образование и да ги реализира своите идни планови. Оваа стипендија е јасен показател дека општеството ги препознава и високо ги цени вистинските херои кои живеат меѓу нас.
Премиерот Мицкоски исто така порача дека Јован е „светлина во моменти на темнина“ и дека неговото име ќе остане трајно запишано како инспирација за сите граѓани на Македонија, поттикнувајќи ги да бидат подобри, посилни и похрабри во секојдневниот живот. Чинот на Јован Костадинов е вистински пример дека храброста не познава граници и дека вистинските херои се оние кои имаат срце полно со човечност.
