Путин без милост: Украинците во Курск ќе завршат или мртви или предадени

Рускиот претседател Владимир Путин, на заедничка прес-конференција со белорускиот претседател Александар Лукашенко, остро ги коментираше случувањата во Курск и предложениот прекин на огнот со Украина.

Путин се осврна на предлогот за прекин на огнот, заблагодарувајќи му се на американскиот претседател за неговата улога во обидите за решавање на конфликтот. Тој нагласи дека Русија се согласува со идејата за прекин на огнот, но под услов тој да води кон траен мир и да ги елиминира причините за конфликтот.

„Бев во Курск, ситуацијата е под наша целосна контрола. Групата која влезе на таа територија е опколена. Командата на украинската војска таму е уништена и претрпе загуби. Се обидуваа да се повлечат во мали групи, но сè е под наша контрола. Ја оставија својата опрема. Во следните неколку дена ќе го блокираме регионот и никој нема да може да избега. Ќе има само два начина да се излезе од таму – со смрт или со предавање. Би било добро украинската страна да има 30 дена примирје, и ние сме за тоа. Но, што значи тоа за Курск? Да им се овозможи на Украинците слободно да заминат, на луѓето кои извршиле злосторства? Што ќе се случува на линијата на фронтот? Русија сега е во офанзива на сите правци. Како ќе ги искористат тие 30 дена? За да продолжат со присилна мобилизација во Украина, да доставуваат оружје и да обучуваат единици? Како ќе спроведеме контрола, како ќе ни биде гарантирано дека тоа нема да се случи? Кој ќе издава наредби за прекин на огнот? Станува збор за 2000 километри, кој ќе одлучи кој и каде го прекршил примирјето?“, запраша Путин.

Тој додаде дека овие прашања мора внимателно да се разгледаат од двете страни и дека идејата за мир е добра, но треба да се дискутира. Путин најави дека Русија ќе разговара со американските партнери и можеби ќе оствари повик со претседателот Трамп, повторувајќи ја поддршката за мирно решавање на конфликтот.

„Ги знаеме нашите интереси и нашите цели, разговараме со Трамп. Видовме дека Зеленски беше понижен во Белата куќа и на други места. Сега мора да размислува за мир. Договорот за минералите не беше спомнат претходно, но сега тие се согласуваат на тоа“, рече тој.

Путин исто така истакна дека доколку Русија и САД се договорат за соработка во енергетскиот сектор, тогаш гасоводите кон Европа би можеле да бидат ставени во функција, што би довело до снабдување со евтин гас.