Весна Љ.
Необична случка е забележана во океанот кај северниот брег на Нов Зеланд. Портокалов октопод е снимен како се „вози“ на грбот на ајкула мако. Ова е најбрзата ајкула во светот.
Снимката е направена во декември 2023 година. Универзитетот во Окленд неодамна ја објави. Рошел Константин, професор по морска биологија, изјави дека се работи за ајкула мако. Но, што е тоа портокалово на нејзината глава? Тие помислиле дека е бова или повреда. Затоа го лансирале дронот и ставиле камера во водата. Снимиле нешто незаборавно – октопод закачен за главата на ајкулата. Тој се држел со своите пипала.
Научниците биле воодушевени од глетката. Ова се два вида кои не би требало ни да се сретнат. Октоподите живеат на дното на морето. Ајкулите мако (Isurus oxyrinchus) главно живеат близу површината, пишува порталот „Лајв сајенс“.
Професорката Константин додаде дека навистина не знаат како овој октопод, кој живее на морското дно, стигнал на оваа три метри долга ајкула која живее во отворени океански води. Таа рече дека тоа е вистинска мистерија, но океанот е полн со неочекувани работи.
Ајкулите мако можат да достигнат брзина од 74 километри на час. Тие растат до 3,7 метри. Овие ајкули се познати по неверојатните скокови, дури до шест метри над водата. Константин смета дека на ајкулата можеби не ѝ пречел октоподот. Секако не изгледало дека ѝ пречи додека лесно пливала. Таа додаде дека ако ајкулата пливала побрзо, верува дека октоподот ќе се откачел.
