Светите Козма и Дамјан: Ден за молитва и здравје

Денес, православните верници ја слават славата посветена на Светите Козма и Дамјан, кои се сметаат за заштитници на медицинската професија и лечителите. Познати како „Свети лекари“, овие светци се запаметени по својата безрезервна посветеност кон лекувањето на болните, без да побараат материјална награда – тие лечеле „заради Бога“.

Многу здравствени установи ги почитуваат како свои патрони, препознавајќи го нивниот хуманитарен дух и љубов кон сите луѓе, без оглед на националност или религија. Според преданието, единствено што Козма и Дамјан барале од своите пациенти било почитување на Христовото име.

Молитва за здравје

На овој ден, според народното верување, е добро време за молитва за здравје и исцелување на блиските. Молитвата се препорачува да се чита секој ден 40 дена по ред, како дел од верувањето во нејзината исцелителна моќ.

Молитва кон Светите Козма и Дамјан:

Кон вас, свети бесребреници и чудотворци Козма и Дамјане, како кон брзи помошници и топли молитвеници за нашето спасение, ние недостојните (имињата), клекнувајќи на колена, прибегнуваме и припаѓајќи усрдно повикуваме: Не презирајте ги молењата од нас грешните, немоќните, кои паднавме во многу беззаконија, и кои во секој час и ден грешиме. Умолете Го Господа, да ни даде, нам недостојните Негови чеда, од Својата богата милост: избавете нѐ од секоја мака и болест, бидејќи вие примивте од Бога и Спасителот наш Исус Христос непотрошлива благодат за исцелување, поради цврстата вера, бесплатното лечење и вашата маченичка смрт. Да, угодници Божји, не престанувајте да се молите за нас, кои со вера кон вас итаат: иако според мноштвото на нашите гревови и не сме достојни за вашето милосрдие, сепак, вие, верни и вистински подражатели на Божјото човекољубие, направете, да принесеме плодови достојни за покајание, и во вечниот покој да достигнеме, фалејќи и благословувајќи Прекрасниот во Своите светии Господа и Бога и Спасителот наш Исус Христос и Неговата Пречиста Мајка, и вашето топло застапништво, сега и секога, и во вечни векови. Амин.

Оваа молитва е посветена на нивната милост и Божјата благодат и се изговара со желба за здравје и духовно заздравување за сите.