Скопје повторно меѓу најзагадените градови во светот, втор најзагаден во Европа

Со доаѓањето на постудените денови, главниот град на Македонија повторно се најде на врвот на листата на најзагадени градови во светот. Според податоците на платформата „IQAir“, Скопје во моментов е на шестото место во светот со индекс на загаденост од 165. Листата ја предводат Делхи и Лахор, познати по хронично високиот индекс на загаденост.

Во европски рамки, Скопје е веднаш зад Сараево, кој има индекс од 182, а меѓу загадените градови од регионот е и Приштина со индекс од 128. Загадениот воздух останува главен предизвик за градовите на Балканот, особено во зимските месеци кога користењето на фосилни горива и други согорувачи значително се зголемува.

Министерот за животна средина, Изет Меџити, неодамна изјави дека ситуацијата со загадувањето е комплексен проблем кој не може да се реши брзо. Тој најави дека се подготвуваат нови мерки во соработка со локалните самоуправи, при што 40% од планираните проекти се насочени кон решавање на еколошките проблеми. Меџити најави и редовни неделни известувања за конкретни активности кои ќе се преземаат во следниот период за подобрување на квалитетот на воздухот.

Минатата година, загаденоста во Скопје достигна загрижувачки нивоа, а податоците покажуваат дека во декември 2023 година, квалитетот на воздухот бил дури и полош во споредба со истиот период од 2022 година. Секојдневните мерки се насочени кон ублажување на проблемот, но потребно е уште многу труд за да се постигне долгорочно подобрување.