Стефан Михајловски: „Среќен сум што донесов медал за Македонија“

Михајловски го оцени својот настап како успешен, истакнувајќи дека победата против германскиот репрезентативец Стефан Тих била резултат на макотрпни тренинзи. Во полуфиналето, тесно загубил од украинецот Бабенко со разлика од само еден поен, но го смета бронзениот медал за голем успех.

– „Среќен сум што донесов медал за Македонија. Секоја борба е тест на физичка и ментална сила, а бронзата е поттик за уште поголеми достигнувања,“ изјави Михајловски.

Како се стигнува до успех на големите првенства?

Според Михајловски, континуираните тренинзи, дисциплината и надградувањето на техниката се клучни за успех.

– „Се почнува со локалните државни првенства, каде што се изградени основите. Понатаму, напредуваме кон поголеми натпревари како Балкански, Европски и Светски првенства,“ објаснува Стефан.

Освен тренинзите во клубот Прокик-Фемили, тој вклучува и дополнителни подготовки пред важни настани, со посебен акцент на издржливоста и кондицијата.

Поддршка од државата и предизвици

Стефан е благодарен за поддршката од клубот и државата, која вклучува стипендии и финансиска помош. Сепак, потенцира дека за учество во меѓународни тренинг-кампови со врвни кикбоксери се потребни поголеми финансиски средства.

– „Се надевам дека со новото Министерство за спорт ќе добиеме уште поголема поддршка, што ќе ни овозможи да се стремиме кон уште поголеми спортски успеси,“ изјави тој.

Идни планови: „Златото е целта“

Михајловски останува амбициозен и посветен на својата спортска кариера, со јасна цел да го освои златниот медал на идните првенства.

– „Секој медал е потврда на мојата работа, но златото е сон кој се стремам да го претворам во реалност,“ додава тој.

Популарноста на кикбоксот и улогата на жените во спортот

Стефан истакнува дека интересот за кикбоксот расте, особено кај младите, и смета дека спортот не е резервиран само за мажи.

– „Кикбоксот е спорт за сите. Во нашиот клуб има многу девојки кои тренираат и се третирани исто како и момчињата. Овој спорт помага не само во физичкиот развој, туку и во градењето карактер,“ вели Михајловски.

Со бронзен медал од Европското првенство и јасна визија за иднината, Стефан Михајловски продолжува да биде инспирација за младите спортски надежи во Македонија.