„Тоше ни недостасува секој ден“: Маратонци и обожаватели одбележаа 17 години без легендарниот Проески

Во Крушево, бројни обожаватели и поддржувачи на Тоше Проески, од Македонија и регионот, се собраа за да оддадат почит на пејачот кој трајно го одбележа музичкиот свет. Овој емотивен настан се случи пред неговото вечно почивалиште на Гумење, каде се одбележаа 17 години од трагичната сообраќајна несреќа во која Тоше го загуби животот на 16 октомври 2007 година.

Особено трогателен момент беше пристигнувањето на 14-те маратонци, кои и оваа година го истрчаа ултрамаратонот од Нова Градишка, Хрватска, до Крушево. Ова трчање се одржува веќе 17 години во чест на Тоше.

„Секогаш велиме дека ова е за Тоше. Благодариме на Бога и на него што нè чуваше на патот,“ рече маратонецот Наум Капричевски, кој изрази надеж дека маратонот ќе продолжи уште многу години.

Присутните обожаватели од повеќе земји ја покажаа нивната бескрајна љубов и сеќавања за Тоше, додека ученици од Крушево ги пееја неговите песни. За многумина, овој настан е доказ дека љубовта кон Тоше не бледнее, а неговата музика продолжува да живее.

Наредниот месец, дел од спомените на Тоше ќе бидат претставени во Загреб, каде ќе бидат изложени облека и гитари од неговите настапи, што е уште еден начин да се зачува неговото наследство.