Фон дер Лајен го ПРЕТСТАВИ планот за ВООРУЖУВАЊЕ на Европа: „Ова е КЛУЧЕН МОМЕНТ!“

Претседателката на Европската комисија, Урсула фон дер Лајен, го претстави планот за масовно вооружување на Европа, оценувајќи го моментот како клучен за иднината на Унијата. Ова се случува во време кога Соединетите Американски Држави ја прекинаа воената помош за Украина, сигнализирајќи промена во глобалната геополитичка слика.

САД ја прекинаа помошта за Украина – Европа се буди?

Неколку дена по напнатиот разговор меѓу американскиот претседател Доналд Трамп и украинскиот претседател Володимир Зеленски, претставник на Белата куќа за „Ројтерс“ потврди дека САД ја прекинале воената помош за Украина. „Ова не е трајно прекинување на помошта, тоа е пауза“, изјави претставник на администрацијата на Трамп за „Фокс њуз“. „Блумберг“ објави дека е запрена испораката на целата американска воена опрема која моментно не е во Украина.

Фон дер Лајен: „Траен мир се гради само на сила“

Во вакви околности, претседателката на Европската комисија, Урсула фон дер Лајен, денеска изјави дека новите планови на ЕУ за зајакнување на европската одбранбена индустрија и зголемување на воените капацитети би можеле да мобилизираат речиси 800 милијарди евра. Зборувајќи на прес-конференција, Фон дер Лајен најави дека ЕУ ќе предложи на земјите членки да им се обезбеди поголем фискален простор за инвестиции во одбраната, како и 150 милијарди евра заеми за такви инвестиции, заедно со мобилизација на приватен капитал.

Пет клучни точки од планот за вооружување на Европа

„Потребно ни е големо зголемување на одбранбениот капацитет, нема сомнеж за тоа. Сакаме траен мир, но траен мир може да се изгради само на сила, а силата почнува со зајакнување на самите себе“, рече Фон дер Лајен. Таа додаде дека испратила писмо до европските лидери и наведе пет клучни точки од планот за повторно вооружување на Европа:

1. Зголемување на јавното финансирање за одбраната – доколку земјите членки ги зголемат трошоците за одбрана за 1, 5 % од БДП, тоа би можело да создаде фискален простор од речиси 650 милијарди евра во следните четири години;
2. Нов инструмент, кој обезбедува заеми од 150 милијарди евра за одбранбени инвестиции од страна на земјите членки;
3. Користење на буџетот на Европската Унија за одбранбени проекти;
4. Мобилизирање приватен капитал преку Унијата за штедење и инвестиции;
5. Мобилизирање приватен капитал преку Европската инвестициска банка.

„Клучен момент за Европа“ – 800 милијарди евра за одбрана

Фон дер Лајен истакна дека овие планови би можеле да мобилизираат речиси 800 милијарди евра за зајакнување на одбранбените и воените капацитети на Европа. „Ова е клучен момент за Европа и ние мора да го искористиме“, рече таа, подвлекувајќи ја сериозноста на ситуацијата и потребата од брза и ефикасна акција.