Херојот Магава! Стаорецот деминер угинал во осмата година: Во својата кариера прегледал повеќе од 100 мински полиња

Стаорецот Магава, херој меѓу животните и деминер награден со златен медал за херојски потфати, умрел во осмата година од животот.

Во петгодишната кариера тој глодар прегледал повеќе од 100 мински полиња и експлозивни направи во Камбоџа. Магава е најуспешниот стаорец кој минал едногодишна обука во организацијата Апопо од Белгија, пренесува “BBC”.

Таа организација уште од 90-тите години од минатиот век во Танзанија ги тренира овие животи, познати како “стаорци херои”, да откриваат мински полиња и туберкулоза. Животните по една година стекнуваат и сертификат за завршената обука.

Стаорците учат да намирисаат хемиска компонента внатре во мините, што значи дека го игнорираат металот и така побрзо можат да ги пребаруваат површините. Кога ќе го пронајдат експлозивот почнуваат да ја гребат земјата и така им даваат сигнал на луѓето да им се приклучат.

Магава можел да испита подрачје со големина на тениски терен за 20 минути, а за тоа на луѓето со детектори им се потребни меѓу еден и четири дена. Во текот на кариерата исчистил повеќе од 141.000 квадратни метри, што е еднакво на површина од 20 фудбалски терени.

Бил долг 70 центиметри и тежок 1,2 килограми. Иако бил многу поголем од останатите видови на стаорци, Магава и натаму бил доволно ситен и лесен да не детонира експлозиви кога гази по нив.

Во текот на 2020-та година Магава добил златен медал “PDSA”, што е орден за животни за посветеност и должност. Бил првиот стаорец што го добил тоа признание во 77-годишната историја. Минатиот јуни заминал во пензија, откако “забавил во староста”.