ЦРВЕНИ ЛИНИИ НА УКРАИНА: Зеленски порача дека нема отстапување од териториите и војската!

Во пресрет на потенцијалните мировни разговори за ставање крај на конфликтот со Русија, украинскиот претседател Володимир Зеленски зазеде цврст став. Тој истакна дека Украина нема да направи компромис околу клучните прашања за територијалниот интегритет и воената сила на земјата.

Зеленски на средба со лидерите на територијалните заедници на Чернихив нагласи дека приоритет на Украина е силна армија и дека намалување на нејзиниот број е неприфатливо. „Наш приоритет е нашата силна армија. Значи, ова е црвена линија за нас – нема намалување на бројот на нашата армија. Да бидам искрен, ќе направиме се за да ја задржиме армијата во состојбата во која е денес. Голема армија, три пати поголема отколку што беше на почетокот на војната“, изјави тој.

Друга клучна црвена линија за Украина, според Зеленски, е непризнавањето на ниту една територија окупирана од Русија. Тој потенцираше дека сите овие територии се украински и се наоѓаат под привремена окупација. „Друго геополитичко прашање е непризнавањето на какви било територии окупирани од Русија. Тоа се украински територии, ова е една од најважните црвени линии за нас. Во секој случај, тоа се привремено окупирани територии“, рече Зеленски, цитиран од Укринформ.

Украинскиот лидер заклучи дека праведен мир за Украина ќе биде постигнат само кога ќе бидат вратени сите нејзини територии кои во моментов се под контрола на Русија.