Чудото на Томи: Се роди во 24-та недела, а денес е здрав и насмеан

Семејството Прат од Лестершир, Велика Британија, помина низ емоционално патување откако нивниот син Томи се роди предвреме, во 24-та недела. Тогаш тежел само 680 грама, а неговото малечко стапало едвај било поголемо од прстот на мајка му. Ова мало момче стана симбол на борбеност и надеж.

Каријан Прат, мајката на Томи, се соочила со сериозни компликации уште во 19-та недела од бременоста. Иако со грижлива нега успеала да ги издржи до 24-та недела, породилните болки ја изненадиле, и по само 25 минути, Томи бил роден во Кралската болница во Лестер, со што започнала неговата борба за живот. Малото бебе помина 102 дена во болница, поврзано со бројни машини, за да ги преброди компликациите, како мозочно крварење, хронично белодробно заболување и проблеми со очите. Но, Томи издржа!

На 19 април 2021 година, точно пред датумот кога требаше да се роди, тој конечно беше подготвен да си оди дома. Сестричката Лили, која поради ковид-ограничувањата долго не можеше да го види, конечно го дочека со нетрпение.

Денес, Томи е здраво и весело двегодишно дете, полн со енергија и љубопитност, кое постигнува нови развојни чекори. Неговата мајка, Каријан, изјави: „Тој е зборлив и смешен, а секој ден ни покажува колку далеку сме стигнале. Горди сме на нашиот мал херој!“