5 Знаци кои укажуваат дека внесувате премногу шеќер

Многумина не можат да си го замислат животот без слатки, па често не размислуваат дали внесуваат премногу шеќер на овој начин. Американското здружение за срце (American Heart Association) препорачува да не се внесуваат повеќе од 25 до 36 грама, односно околу 100 до 150 калории шеќер дневно, додека Светската здравствена организација (СЗО) препорачува најмногу 50 грама шеќер дневно, со забелешка дека би било најдобро внесот да се сведе на 25 грама, пишува Voque.

Ако земеме предвид дека една лименка Coca-Cola содржи 39 грама шеќер, дека дури и „здравите“ намирници, како гранола, содржат околу 8 грама шеќер, а грчкиот јогурт со боровинки има 14 грама, јасно е дека нашата исхрана е полна со скриени шеќери, што ги става овие препорачани граници во сосема нова перспектива.

Консумирајќи храна која содржи шеќери, повеќето од нас внесуваат најмалку двојно повеќе шеќер од препорачаното. Во основа, тоа не го правиме намерно. Тие шеќери се скриени во слатки, колачи и сокови, како и во многу преработени производи, и не секогаш е лесно да се препознаат на листата со состојки.

Некои од поимите што укажуваат на додаден шеќер, а не изгледаат така на прв поглед, се:

• Сахароза: хемискиот термин за обичен шеќер
• Гликоза, гликозен сируп или декстроза: често присутни во преработена храна
• Фруктоза: овошен шеќер кој често се наоѓа во овошен или пченкарен сируп
• Пченкарен сируп (пченкарен сируп со висок процент на фруктоза): високо преработен сируп кој се користи во многу безалкохолни пијалаци
• Малтоза: сладен шеќер, често присутен во леб и пиво
• Декстроза: уште еден облик на гликоза
• Лактоза: млечен шеќер кој се наоѓа во млечни производи
• Инвертен шеќер: шеќер што се добива со разградување на сахароза и се наоѓа во многу кондиторски производи
• Мед: често се смета за „природен“, но и тој е облик на шеќер
• Агавин сируп, јаворов сируп или оризов сируп: алтернативни засладувачи кои исто така содржат шеќер.

На кратко, сè што завршува на „-оза“, како и „сирупи“ и „засладувачи“, речиси секогаш значи шеќер.

Знаци дека јадете премногу шеќер

Нема ништо чудно што консумацијата на шеќер може лесно да излезе од контрола, вели д-р Лела Ахлеман, специјалист по дерматологија, флебологија, проктологија и нутриционизам, која ги истакнува можните знаци дека човек внесува премногу шеќер.

1. Дебелеење и постојан глад

Не е тајна дека шеќерот содржи многу калории. Но постои и друга причина зошто шеќерот толку брзо води до дебелеење: „Ако јадете премногу шеќер, постојано ќе сте гладни“, вели Ахлеман.

• Причината за ова е што шеќерот краткорочно го подигнува нивото на гликоза во крвта, но не обезбедува долготраен ефект на ситост, поради недостаток на влакна. Постојаната глад која ве тера да јадете повеќе, на крај доведува до дебелеење. Ова е јасен знак дека внесувате премногу шеќер“, вели таа.

2. Акни

Кога внесуваме шеќер, не се зголемува само нивото на инсулин, туку и хормонот во крвта наречен инсулино-сличен фактор на раст 1 (IGF-1), објаснува Ахлеман.

• Заедно со инсулинот, овој хормон ги стимулира лојните жлезди и прекумерната кератинизација во нивното подрачје, што води до затнување и воспаленија – додава таа.

3. Жудња за слатко и промени во расположението

Големото зголемување на нивото на гликоза во крвта води до ослободување на инсулин, често толку многу што шеќерот во крвта не се спушта на нормално ниво, туку под основната вредност, што доведува до релативна хипогликемија и со тоа жудња. Кај некои луѓе, тоа доведува и до промени во расположението и раздразливост, вели Ахлеман.

4. Воспаленија и ослабен имунолошки систем

Нормално, телото апсорбира шеќер преку тенкото црево. Но, ако количината на едноставни шеќери како гликоза и фруктоза ја надминува способноста на тенкото црево, тој шеќер завршува во дебелото црево, објаснува Ахлеман. Експертите истакнуваат дека овој шеќер во дебелото црево станува храна за бактериите кои нормално се наоѓаат таму.

• Ова селективно хранење доведува до прекумерен раст на овие бактерии. Проблемот е што, за жал, овие бактерии на својата површина носат ендотоксини, таканаречени липополисахариди. Овие токсини можат да излезат од цревата, да влезат во крвотокот и да предизвикаат „тивки“ воспаленија, кои го забрзуваат стареењето на телото и го ослабуваат имунолошкиот систем – објаснува таа.

5. Забрзано стареење

Научно е докажано дека високото ниво на внес на шеќер води до создавање на таканаречени AGE или напредни производи на гликација, објаснува Ахлеман. Таа го споредува овој ефект со карамелизација: Во нашиот колаген, влакната треба да бидат паралелни, но кога ткивото е наситено со шеќер, доаѓа до попречни врски во колагенското сврзно ткиво, што го прави круто, кршливо и склоно на дегенерација. И – што е многу важно – телото е помалку способно само да го поправи. Тоа значи дека квалитетот на нашиот колаген опаѓа.