Рада Манојловиќ изгубила 100.000 евра за 6 месеци: „Менџерот ме закопа, багер не би можел да ме откопа!“

Популарната пејачка Рада Манојловиќ открива дека го прекинала долгогодишниот професионален однос со својот менаџер поради тоа што тој наводно ја поткрадувал повеќе години. Таа сега одлучила управувањето со нејзината кариера да го довери на својата сестра Маја, откако забележала дека викенд настапите ја оставале без големи суми пари, понекогаш дури и по 5.000 евра.

Манојловиќ зборува отворено за моментот кога сфатила дека нејзиниот поранешен менаџер ја измамувал. По повеќе од 15 години соработка, пејачката решила да ја прекине професионалната врска со него поради години на наводни финансиски измами. Според неа, тие имале длабок однос, биле куќни пријатели, а менаџерот ѝ бил доделен уште во младоста од музичката продукција „Гранд“. Но, и покрај тоа, ситуацијата станала неподнослива, а нејзиното трпение пукнало кон крајот на 2021 година, кога одлучила дека повеќе не може да продолжи така.

„Ме закопа, багер не би можел да ме откопа. Сите новинари го знаат ова, внатрешно. Бевме куќни пријатели. Тој ми беше доделен од ‘Гранд’ како девојче, и со години работевме заедно и заработувавме многу пари. Пресеков за новогодишната ноќ во 2022 година. Си реков: ‘Радмила, веќе не можеш вака да работиш!’ Ако треба, ќе пеам повторно во шатор, бидејќи на крајот на краиштата, кој доаѓа во шатори? Па, луѓе“, раскажува Рада.

Пејачката додава дека со поранешниот менаџер работела од 2007 до 2022 година, но дека кражбите почнале во 2016 година, кога веќе не се придржувале до правилата на „Гранд“, туку почнал да ѝ краде директно од заработките. Пред тоа, според неа, повеќе се крадело од „Гранд“ и од нивниот водечки човек, Саша Поповиќ. Но, после 2016 година, фокусот се префрлил на неа, а таа поради љубовни проблеми не обрнувала внимание на тоа дали има пари или не. „Не ми беше важно дали имам пари, само ми беше доволно да живеам“, вели Рада.

Нејзината сестра Маја, која сега ја води нејзината кариера, била таа која прва открила дека парите недостасуваат. „Разбравме дека ме поткрадува кога Маја се скара со дечкото и дојде кај мене да живее. Маја е сосема спротивна од мене – таа брои, чува сите сметки… Една вечер ги броеше парите и ми вели: ‘Тука фалат пари!’ Јас ѝ реков: ‘Ма, нема шанси, Мaјо!’ Го повикавме него, да не го именувам сега, и тој ни вели: ‘Извинете, децата си играле со ковертот!’ Така, парите некако исчезнуваа цели шест месеци“, објаснува Рада.

Ситуацијата достигнала точка на кулминација кога не се знаело на кој начин се уплаќаат парите – понекогаш на сметката на братот на неговата жена, некогаш на неговата сметка, некогаш на нејзината. Во тие шест месеци Рада била оштетена за сума со „повеќе од пет нули“, според нејзиното кажување.

Иако загубила значителна сума пари, Рада одлучила да не го тужи поранешниот менаџер. „Не го тужев. Не сакам… Да, тоа е кражба, но јас сум добра, а знаете како велат – добриот и глупавиот се родени браќа. Не е тоа ништо вредно за стресот што го поминав. Шест години не снимив ништо, имав нарушена самодоверба и сето тоа. Пари ќе има! Јас сум некој кој рано остана без мајка и парите не ми помогнаа да ја спасам, ниту да ја вратам. Парите што ги имам сега, а можев да имам многу повеќе, за мене не претставуваат среќа. Што ќе ми се ако полудам и завршам на психијатрија? Што ќе ми се пари?“, изјави Рада за „Блиц“.

Да потсетиме, во медиумите како бомба одекна веста дека една од најангажираните пејачки на овие простори ја прекина соработката со менаџерот Саша Ѓуриќ. Рада со Ѓуриќ работела од почетокот на својата кариера, но според извори блиски до пејачката, тој постојано ја поткрадувал. Често се случувало, за два настапа за време на викенд, да остане без 5.000 евра, бидејќи менаџерот преговарал други цени од тие што ѝ ги соопштувал неа.

Истите извори тврдат дека не се работело само за кражби од настапи низ европските клубови, туку и за приватни веселби и големи настани. „Исто важи и за приватните веселби, кога големи компании ја ангажираа да пее на прослави и слични настани. На пример, ѝ велеше дека договорил настап за 5.000 евра, а всушност земал од 6.500 до 7.000 евра. Плус, како менаџер, си земаше 20% од таа сума што ѝ ја соопштуваше“, открива изворот.

На овие обвинувања, кратко се огласил и Саша Ѓуриќ, изјавувајќи: „Ви благодарам што ми кажавте. Немам друг коментар.“