Најголемиот пороен дожд во последните 50 години предизвика поплави во Сахара: По неколку децении, езерото повторно се наполни со вода

Ова лето сведочиме на незамисливи природни феномени, кои се последица на климатските промени.

Фотографии од Мароко покажуваат сцени по најголемиот пороен дожд во последните неколку децении, кој ја погоди Сахара, еден од најсушните региони во светот. Овој ненадеен порој предизвика поплави, а езеро кое било пресушено пред половина век повторно е исполнето со вода, објави „Дејли Мејл“. Мароканските власти соопштија дека двата дена врнежи донеле повеќе вода од годишниот просек за овој регион.

Песочните дини не можеа да ја апсорбираат оваа огромна количина на вода, оставајќи зад себе водени лагуни меѓу палмите и пустинските пејзажи на Сахара. Некои од најсушните области, кои не виделе дожд со децении, сега се полни со животворна вода.

Југоисточниот пустински дел на Мароко е еден од најсушните на планетата, каде речиси никогаш не врне на крајот од летото. На некои места паднале над 250 милиметри дожд на квадратен метар, што е неверојатно за овој регион.

Во селото Тагунит, околу 450 километри јужно од Рабат, за само 24 часа паднале над 100 милиметри дожд. Според сателитските снимки на НАСА, дождовницата се слила во езерото Ирикуи, познато меѓу градовите Загора и Тата, кое е пресушено веќе 50 години.

Во пустинските заедници, популарни меѓу туристите, теренски возила со погон на четири тркала се бореле со водените бари, додека локалното население во неверување го набљудувало овој невообичаен призор.

„Поминаа 30 до 50 години откако имавме ваков интензивен дожд во толку краток период,“ изјави Хусеин Јуабеб од Мароканската генерална дирекција за метеорологија.

Овие врнежи, познати како екстратропска бура, според метеоролозите, би можеле да влијаат врз климатските услови во регионот во месеците и годините што доаѓаат, бидејќи воздухот ќе задржува повеќе влага, предизвикувајќи поголема испарување и привлекувајќи повеќе бури.