Ferrari F80: Новиот хибриден ѕвер со 1200 КС – најмоќниот сериски модел досега!

Ferrari повторно го подигна стандардот за хиперспортски автомобили со својот најнов модел, F80, кој доаѓа со неверојатни 1200 коњски сили. Овој модел, духовен наследник на иконскиот LaFerrari, е вистинско ремек-дело на инженерството и дизајнот од Маранело.

F80 е хибриден автомобил со V6 бензински мотор кој сам по себе произведува 900 КС, додека три електромотори ја зголемуваат моќта на вкупни 1200 КС. Иако е хибрид, овој модел не може да се движи само на електрична енергија, но возачите имаат избор меѓу три режими на возење: Hybrid, Performance и Qualify.

Што се однесува до перформансите, F80 достигнува 100 км/час за само 2,15 секунди, со максимална брзина која надминува 350 км/час. Електричните мотори се развиени независно од Ferrari, базирани на нивното искуство од Формула 1, што значи дека секој аспект на автомобилот е дизајниран за максимални перформанси.

Производството на овој модел ќе биде ограничено на 799 примероци, а цената започнува од 3,6 милиони евра. Првите примероци се очекува да бидат испорачани во рок од една година, а производството ќе трае до 2027 година, што го прави F80 не само перформансна икона, туку и вистинска инвестиција за колекционерите.

Ferrari F80 е сè што еден хиперспортски автомобил треба да биде – брз, моќен и ексклузивен.