Норвешка планира да забрани користење на социјалните медиуми за деца под 15 години

Норвешката влада планира да воведе нова минимална возраст од 15 години за користење на социјалните мрежи, како дел од напорите да ги заштити младите од негативните ефекти на дигиталниот свет. Премиерот Јонас Гар Шторе изјави дека оваа мерка ќе биде „тешка битка“, но неопходна за да се заштитат децата од „моќта на алгоритмите“, пренесува Guardian.

Иако социјалните медиуми можат да понудат чувство на заедница за осамените деца, Шторе нагласи дека тоа не треба да биде контролирано од алгоритми, кои можат да доведат до изолација и негативни ефекти врз менталното здравје.

Владата ќе воведе дополнителни мерки за да ги спречи децата да заобиколат ограничувањата за возраста, вклучувајќи промени во Законот за лични податоци. Ова ќе значи дека платформите ќе можат да обработуваат лични податоци само од корисници постари од 15 години. Иако Норвешка веќе има минимална возраст од 13 години, истражувањата покажуваат дека значителен број деца под оваа возраст сè уште активно ги користат социјалните медиуми.