Денес е Свети Лука – заштитник на болните и основач на иконописот

Православната црква денес го слави Светиот апостол и евангелист Лука, светец познат како заштитник на болните и основач на христијанскиот иконопис. Роден во Антиохија, Свети Лука беше добро образуван во грчката филозофија и медицината, вештини кои ги употребил и во својата мисија за проповедање на христијанската вера.

Свети Лука бил сведок на животот на Христос, а по Воскресението, заедно со Клеопа, Го видел Господ на патот за Емаус. Со благословот на Светиот Дух, се враќа во Антиохија и станува близок соработник на апостолот Павле, патувајќи со него низ разни земји, меѓу кои и Италија, Далмација и Македонија, каде многумина ги вовел во верата.

Покрај неговото Евангелие, напишано околу 60-та година, Свети Лука ги создал и првите христијански икони, меѓу кои и три икони на Пресвета Богородица, како и икони на апостолите Петар и Павле, поставувајќи темел на иконописната традиција.

Свети Лука починал на 84-годишна возраст како маченик во Грција, каде што бил обесен заради својата вера. Неговите мошти подоцна биле пренесени во Цариград, каде продолжиле да се почитуваат како свет религиозен артефакт.

На денешниот празник, според народното верување, не се препорачува да се извршуваат тешки работи, бидејќи Свети Лука е заштитник на здравјето и телесната сила.