Почина Оливера Николова, авторката на омилената детска книга „Зоки Поки“

Македонската книжевна сцена загуби уште една легенда – Оливера Николова, авторката на култната детска книга „Зоки Поки“ и инспирација за генерации читатели, почина на 88-годишна возраст. Позната како „мајката на македонските писателки,“ Николова е една од најчитаните и најнаградувани авторки во Македонија, со дела кои оставија длабок белег во македонската литература за деца и возрасни.

Родена во Скопје на 11 март 1936 година, Николова го завршила своето образование на Филозофскиот факултет при Универзитетот „Св. Кирил и Методиј“. Голем дел од својот животен и професионален пат го посвети на Македонската радио-телевизија, работејќи како уредник и драматург. Беше член на Друштвото на писателите на Македонија од 1963 година и автор на повеќе телевизиски и радио-проекти.

Николова беше добитничка на Орден за заслуги за Македонија, кој ѝ беше доделен оваа година, како признание за нејзиниот извонреден придонес во културата и литературата. Претседателот на државата ѝ го врачи орденот во нејзиниот дом, истакнувајќи дека признанието одамна го заслужува.

Покрај „Зоки Поки,“ Николова зад себе остави богато творештво, вклучувајќи ТВ-серии како „Среќен пат, Зоки!“ и „Девојките на Марко,“ како и радио-драми како „Земја во која не се стигнува“ и „Како расте татковината“. Нејзините дела продолжуваат да инспирираат и да се читаат, потсетувајќи на топлината, мудроста и уникатниот стил на еден од најомилените македонски автори.