Влатко Миладиноски ја запали атмосферата во Германија со „Велат не нема“ – македонските емигранти пееја во еден глас

Влатко Миладиноски, внукот на познатиот пејач Војо Стојаноски, неодамна приреди незаборавна вечер за Македонците во Липштад, Германија. Салата беше преполна со иселеници кои не ја пропуштија можноста да присуствуваат на концертот на еден од најпопуларните фолк-пејачи од Македонија. Настанот беше вистински спектакл, исполнет со емоции, музика и носталгија.

Влатко ја изведе својата голема хит-песна „Велат не нема,“ која ги воодушеви присутните. Македонците се фатија во оро, а познатите стихови одекнуваа низ целиот простор, исполнувајќи ја салата со гордост и заедништво. Моментите беа овековечени и на видео, кое Миладиноски подоцна го сподели на својот Фејсбук профил, благодарејќи им на сите кои беа дел од оваа посебна вечер.

„Велат не нема“ е насловна песна од третиот студиски албум на Влатко и е дело на композиторот Тоде Новачевски и текстописецот Крсте Наумовски – Мечкар. Песната е инспирирана од македонскиот дух и гордост, а секоја изведба го прави моментот уште посебен за сите Македонци во странство.

Овој концерт е уште едно потсетување дека македонската музика останува важен дел од културниот идентитет на иселениците, кои и покрај далечината, не ги забораваат своите корени.