Дац, Александар и Виолета Томовска со старо-нов хит: „Срце да ви заигра“

Дац и Александар, заедно со кралицата на македонската песна Виолета Томовска, предпразнично подготвија музичка магија за својата публика – обновена верзија на вечната песна „Заиграј со мене ти“.

Песната, оригинално напишана од големиот маестро Милан Завков, со текст и изведба на Томовска, ја добива својата современа интерпретација, но го задржува истиот емоционален набој.

Во чест на Милан Завков и Виолета Томовска

Дац и Александар објаснија дека песната е посвета на Милан Завков, чија музика остави траен белег во македонската култура, и чест на Виолета Томовска, која се приближува до својот 80-ти роденден.

„Посакавме да ја вратиме Виолета на сцената, затоа што таа тоа го заслужува,“ велат тие. „Оваа песна е наша желба да донесеме радост, љубов и здравје за празниците и да потсетиме на важноста од почитување на нашите легенди.“

Со енергија и љубов за музиката

Обновената верзија е реализирана со голема поддршка од семејствата Завкови и Томовска, како и соработниците кои ја направија оваа идеја реалност. Дац и Александар истакнаа дека биле инспирирани од енергијата и љубовта на Виолета, која со радост се вклучила во проектот.

„Животот е краток,“ стои во објавата на Дац и Александар. „Денес сме тука, утре можеби не. Затоа да ги чуваме нашите легенди и да носиме љубов и позитивна енергија.“

Песната „Заиграј со мене ти“ сега е достапна за слушање, носејќи ја магијата на македонската музика во ново руво, но со истата безвременска душа.